کراچی(اسٹاف ر پو ر ٹر)مجلس وحدت مسلمین کراچی کی جانب سے یکجہتی فلسطین آل پارٹیز کانفرنس کا انعقاد شہید حمید علی بھوجائی ہال میں کیا گیا، جس میں مختلف سیاسی ،مذہبی و سماجی جماعتوں بشمول متحدہ قومی موومنٹ، پاکستان پیپلزپارٹی،جماعت اسلامی، جی ڈی اے، تحریک انصاف، جے یو پی،مرکزی مسلم لیگ، پاکستان عوامی تحریک اہل حدیث رابطہ کونسل ، شیعہ علماء کونسل، جعفریہ الائنس، زاکرین امامیہ، دیگر جماعتوں کے رہنماؤں نے شرکت کی ۔کانفرنس سے صدارتی خطاب میں مرکزی رہنما علامہ حسن ظفر نقوی نے کہا کہ اسرائیل غاصب ریاست ہے۔ دنیا بھر میں یہ پروپیگنڈہ کیا جارہا ہے کہ گزشتہ 75 سال سے اسرائیل نے فلسطینیوں کو یرغمال بنایا ہوا ہے اور بچوں، خواتین، جوانوں اور بزرگوں کا بے رحمی سے قتل عام کیا جارہا ہے ڈاکٹر فاروق ستارنے خطاب میں کہا کہ مسئلہ فلسطین امت مسلمہ کا بنیادی مسئلہ ہے ۔35 روز سے فلسطین میں اسرائیلی بربریت جاری ہے۔شہدائے فلسطین کو خراج عقیدت و خراج تحسین پیش کرتے ہیں۔کانفرنس میں سیاسی رہنما فیصل علی بلوچ، علامہ عقیل انجم، امجد اسلام امجد، علامہ ناظر عباس تقوی، علامہ باقر عباس زیدی، ثاقب نوشائی، ڈاکٹر صابر ابو مریم، علامہ مرتضی خان نظامی سمیت دیگر مقررین نے اسرائیلی جارحیت کی مذمت کی۔
