اسلام آباد ( خصوصی وقائع نگار ) اسلام آباد چیمبر آف کامرس اینڈ انڈسٹری کے صدر احسن ظفر بختاوری کی قیادت میں ایک وفد نے آئی بی ایمپلائز کوآپریٹو ہاؤسنگ سوسائٹی (گلبرگ گرین) کا دورہ کیا اور سوسائٹی کے صدر طارق محمود، جوائنٹ سیکرٹری بلال ریاض برکی اور دیگر عہدیداران کے ساتھ باہمی دلچسپی کے امور پر تبادلہ خیال کیا۔
احسن ظفر بختاوری نے کہا کہ چیمبر کافی عرصے سے اسلام آباد میں ایک ایکسپو سینٹر کی تعمیر کیلئے کوشاں ہے لیکن جگہ کی عدم دستیابی کی وجہ سے اس پر ابھی تک پیش رفت نہیں ہو سکی،انہوں نے تجویز دی کہ گلبرگ گرین ایکسپو سینٹر کے قیام کیلئے جگہ فراہم کرنے پر غور کرے ،انہوں نے مزید کہا کہ چیمبر اپنے ممبران کیلئے ایک ہسپتال بھی تعمیر کرنا چاہتا ہے لہٰذا انہوں نے تجویز دی کہ گلبرگ گرین چیمبر کوہسپتال کی تعمیر کیلئے پلاٹ الاٹ کرنے پر غور کرے تا کہ چیمبر کے ممبران کو علاج معالجے کی ایک معیاری سہولت فراہم کی جا سکے ،چیمبر کے سابق صدر ظفر بختاوری، جناح سپر مارکیٹ ایسو سی ایشن کے صدر اسد عزیز، سیف الرحمٰن خان، ساجد ستی اور دیگر بھی اس موقع پر موجود تھے ۔
