وزیراعظم پاکستان شہباز شریف نے سعودی عرب پر ہونے والے حملوں کی سخت مذمت کرتے ہوئے کہا ہے کہ ’پاکستان برادر اسلامی ملک سعودی عرب کے ساتھ مکمل یکجہتی کا اظہار کرتا ہے۔‘
ایکس پر جاری بیان میں وزیراعظم شہباز شریف نے کہا کہ ’گزشتہ رات سعودی عرب کے خلاف کیے گئے کھلے حملوں کی پاکستان سخت مذمت کرتا ہے۔‘
انھوں نے کہا کہ ’ایسے قابلِ مذمت اقدامات سعودی عرب کی خودمختاری اور علاقائی سالمیت کی خلاف ورزی ہیں، جو خطے میں امن اور استحکام کو مزید نقصان پہنچانے کا سبب بن سکتے ہیں۔‘
شہباز شریف نے مزید کہا کہ ’پاکستان خطے میں امن، استحکام، سلامتی اور باہمی مفاہمت کے فروغ کے لیے تمام مخلصانہ کوششوں کی حمایت جاری رکھے گا۔‘
یمن میں ایران کے حمایت یافتہ حوثی گروپ کی جانب سے آج یہ دعویٰ کیا گیا تھا کہ ’اس نے سعودی عرب کے ابھا بین الاقوامی ہوائی اڈے کو بیلسٹک میزائلوں اور ڈرونز کے ذریعے نشانہ بنایا ہے۔‘
حوثیوں کے ترجمان یحییٰ سریع نے کہا ہے کہ ’یہ کارروائی سعودی جارحیت، جس نے صنعا بین الاقوامی ہوائی اڈے کو نشانہ بنایا کے جواب میں کی گئی ہے۔‘
یاد رہے کہ گذشتہ سال ستمبر میں پاکستان اور سعودی عرب کے درمیان دفاعی معاملات میں تعاون اور سلامتی سے متعلق ’باہمی دفاع کا سٹریٹجک معاہدہ‘ ہوا تھا جس کے تحت ’کسی ایک ملک کے خلاف بیرونی جارحیت کو دونوں ملکوں کے خلاف جارحیت تصور کیا جائے گا۔‘
